Sunday, 6 December 2015

એક નાનકડી કીડી - બાબુલ

તોફાની વરસાદ
અને એક નાનકડી કીડી

અચાનક આરંભાયેલા તાંડવમાં
ખોવાયેલી કીડીના
લીલાંછમ પગલાં
ઘરડા ઓકનાં પીળચટ્ટા  પાન પર
તરતાં તરતાં નદીએ પહોંચ્યા

કીડી વિહોણાં પગલાંથી
ઉશ્કેરાયેલી બ્હાવરી નદી
ઘરેલું વહેણ-
કિનારા છોડી
કીડી શોધવા દોડી

પ્રવેશ્યા જો  પાણી
શણગારાયેલી બારીઓમાં
પછી બુઝી  રોશની:
કોઈક વાસી  છાપું - કીડીનો તરાપો
સમાચાર: હવા ભરેલી હોડી

હાલક ડોલક વાડી ફળિયા
ડૂબું  ડૂબું શેરી બજાર
ને બાર ગાઉ અંધાર 
ઉપર પાણી કાળું
છાપ્યું એક મથાળું

તોફાની વરસાદ
અને એક નાનકડી કીડી

બાબુલ 












Monday, 9 November 2015

દિવાળી - બાબુલ

આ વરસ જો સપનું ફળે

દરેક જણમાં માણસ મળે

દિવાળીની થાય બંદગી

ઇદના રોજ દીવા બળે

'બાબુલ’

Saturday, 5 September 2015

મૃત શૈશવને - બાબુલ

મૃત શૈશવને* 

નિર્દોષ  આયુ
વંચિત પ્રાણવાયુ
નાની બે હથેળી ઉઠાવી ને બાળ
કહેતું હશે શું - મને સંભાળ

ન કિલ્લા, ન પગલીઓ  રેત બસ રેત
કિનારે ઢગલીઓમાં રહેત બસ હેત 
દરિયો પસવારે નિશ્ચેત ગાલને
કદાચ ઝંખે જીવંત ગઈકાલને

એક ડૂસકું  ડૂબ્યું મધ્યે
મૂંગા મ્હોં  રક્તપાત પ્રત્યે
સાગર થયો વધુ ખારો
આંસુ એક ખર્યું કે તિખારો 

થશે ઈદ - યોમ કીપુર -દીપાવલી- નાતાલ
હાલ તો જાણે ખૂટતા શ્વાસનો સવાલ

બાબુલ
05.09.15

* તૂર્કીના દરિયાકાંઠે ચિર નિંદ્રામાં પોઢેલા શરણાર્થી શિશુને અંજલિ

Saturday, 2 May 2015

ઉકરડાં - બાબુલ

અટવાયા પડઘા અડધા પડધા
થોકબંધ નાડી ઝાંખા પડદા
ધોધમાર વાણી અંગે ઉઝરડાં
વળતા પાણી તરતાં  ઉકરડાં

બાબુલ